Estudante Eskola Sekundária Santu António Baucau foun hamutuk na’in-217 tuir atividade orientasaun eskolár tiinan letivu 2023.
Fiel oficer orientasaun tinan-2023, Nicolau Hilario Viegas, esplika, atividade orientasaun refere hanesan fo koñesementu kona-bá ambiente eskola ba estudante foun ne’ebé hala’o durante loron-rua remata iha loron sesta, 06 Janeiru.
“objetivu hakarak hatudu dalan ba sira kona-ba lalaok eskola ESSA ne’ebé loos,” Fiel oficer orientasaun hateten iha Teulale kinta ne’e.
Atividade ne’ebé hala’o hanesan fahe istória ezisténsia ESSA, sistema utilizasaun fasilidade eskola hanesan biblioteka, fahe matéria kurríkulu edukasaun, informa regra no disiplina eskola ESSA nian.
Antes ne’e eskola refere planeia simu estudante foun hamutuk 135 tuir kapasidade aula eskola maibé tanba estudante barak iha interese nune’e totál estudante foun hamutuk 217 ne’ebé mai hosi área leste hanesan munisípiu Lautém, Viqueque no Baucau.
Estudante Rivania Francisca Marques freitas, sente urgullu kontinua estuda iha ESSA Baucua no prontu tuir orientasaun eskolar tanba fó koñesementu báziku kona-bá lala’ok aprendizajen iha eskola refere.
Jornalista: Natalino Belo
Editor: Evaristo Soares Martins
https://tatoli.tl/2023/01/05/estudante-essa-baucau-nain-217-tuir-orientasaun-eskolar/
